Pam mae popeth mor ddrud y dyddiau yma? Mae gwneud unrhyw beth yn amhosib! Mynd am goffi gyda ffrindiau? £5. Mynd i’r sinema? £15, os nad mwy! Mae hyd yn oed tocyn trên i’r dref yn galed ar y waled. Hynny ydi, os fydd y trên yn troi fyny o gwbl! Weithiau mae’n rhatach dal yr awyren i wlad dramor i ddal fyny gyda ffrindiau!

Y gwir amdani ydi fod cynnydd mewn costau byw a chyflogau sydd ddim yn dilyn chwyddiant wedi rhoi pwysau ar incwm gwario. Nid arian i wario ar bethau er mwyn goroesi – fel bwyd a chynnyrch iechyd, ond arian i’w wario ar weithgareddau cymdeithasol – a phethau nad ydyn nhw’n ‘hanfodol’.

Mae pawb yn gwybod pa mor bwysig ydi cymdeithasu er lles ein hiechyd meddwl, yn arbennig mewn byd sy’n llawn llymder ar y funud. Mae pobl yn cymdeithasu llai nag erioed, ac mae hynny’n gallu arwain at deimlo’n unig. Ond, mae gwneud unrhyw beth gyda’ch ffrindiau yn mynd y gostio. Felly, ar adeg pan mae prisiau yn wirion o uchel a hufen iâ traddodiadol “99” yn costio tua £2.50, sut mae mynd ati i dreulio amser gyda ffrindiau heb orfod gwario’n wallgo’?