Mis Medi – cyfle i ddechrau ar lechen lân. Ble bynnag wyt ti yn dy fywyd, mae yna rywbeth newydd o hyd i edrych ymlaen ato ym mis Medi, does? Dosbarthiadau newydd, cyfle i wneud ffrindiau newydd ac, y peth mwyaf cyffrous, deunydd sgwennu newydd. Mae wastad angen cas bensiliau newydd!

I rai, mae’r wythnosau nesaf yn rhai sy’n arwain at newid byd – symud i ffwrdd i’r brifysgol. Boed rhywun yn symud i ffwrdd o adref am y tro cyntaf neu’n mynychu cwrs agos, ac yn aros adref, dydi ystyried mynd i’r brifysgol fel “newid byd” ddim yn gor-ddweud! I nifer, dyma gyfle i reoli amser, cymdeithasu ac astudio, a hynny am y tro cyntaf yn annibynnol. Neb i ddweud wrthyt ti ble i fynd, pryd i astudio na beth sydd i swper. Fe allet ti gael têcawê bob nos os fyset ti eisiau. Er, dydi hynny ddim yn syniad rhy dda o safbwynt dy iechyd ariannol a chorfforol, ond y pwynt ydi, byset ti’n gallu achos ti di’r boss!

Dyma gyfnod ble mae clwstwr o deimladau mawr yn dod i’r fei. Cyffro, nerfusrwydd, hiraeth … mae bob dim yn digwydd yr un pryd ac mae’n gallu dod i deimlo’n ormod.