“Roedd yna gwpwl ifanc o’r enw Marc a Madeleine Heaton yn byw i fyny’r lôn i mi pan oeddwn i’n tyfu fyny, oedd yn artistiaid llawn amser,” esboniodd Lisa. “Roedd y ddau yn dod draw reit aml a dwi’n cofio meddwl ‘Waw am cŵl, a braf arnyn nhw yn cael gwneud lluniau bob dydd’. Roedd yr artist Eirian Llwyd hefyd yn byw yn y pentref oedd yn fy helpu ac yn barod i rannu ei chyngor gyda mi, felly dwi’n siŵr bod y tri ohonyn nhw wedi cael dylanwad cryf arnaf ac wedi fy ysbrydoli i geisio gweithio yn y maes.”

Yn y byd sydd ohoni, nid dim ond creu gwaith celf sy’n rhaid i artist ei gyflawni. Mae marchnata, hyrwyddo a’r holl waith papur wedi dod yn rhan fawr o fywydau artistiaid, rhywbeth sydd yn anweledol i ni.

“Dwi bendant yn meddwl bod marchnata a’r gwaith admin o redeg busnes yn bwysig iawn ac yn bwysicach heddiw nac erioed. Mae pawb â’u pennau yn eu ffons dyddiau yma a dyna’r ffordd orau o ddal sylw pobl.  Mae bywyd mor brysur i bawb ac mae’n hawdd i fusnesau fynd o dan y radar, felly mae’n bwysig cadw i fyny efo’r marchnata, hel syniadau am sut i ddatblygu’r busnes a meddwl am y camau nesa o hyd. Mae’n dipyn o waith ond dwi’n rili mwynhau.”